ព្យាយាម​គង់​បាន​សម្រេច
សាមគ្គី​ជា​កម្លាំង
ចេះ​ដប់​មិន​ស្មើ​ប្រសប់​មួយ
ចំណេះ​ជា​អាហារ​ ប្រាជ្ញា​ជា​អាវុធ

លក្ខណៈ​បុរស​គ្រប់​លក្ខណ៍​

បុរស​ដែល​ប្រកប​ដោយ​លក្ខណៈ​ ២៦​ យ៉ាង​ហៅថា​ប្រុស​គ្រប់​លក្ខណ៌​គឺៈ

១.​ ឧស្សាហ៍​ខ្នះខ្នែង​ធ្វើ​ការ​រៀនសូត្រ​មិន​ប្រកាន់​ខ្លួន

២.​ មិន​ចេះលួច​ប្លន់​កេង​កិប​ឆរបោក

៣.​ មិន​ឈ្លានពាន​ចំពោះ​កូន​ប្រពន្ធ​អ្នកដទៃ

៤.​ មិន​រំភើប​ញាប់​ញ័រ​ ភ័យ​អរ​ផ្តេសផ្តាស

៥.​​ មិន​កុហកភូត​ភរ​ ឲលើស​ពីការពិត

៦. មិន​​និយាយ​ត្រាប់​ឲ​អៀន​ខ្មាស់

៧ .​ បាន​ឮ​ដំណឹង​ហើយ​វិនិច្ឆ័យ​សិន​ ទើប​ជឿ​ជា​ក្រោយ

៨.​ ធ្វើ​ការ​មិន​រួស​រាន់​ពេក​មិន​យឺត​យូរ​ពេក

៩. មិន​ចេះ​និយាយ​បំភ្លើស​សើច​លេង

១០. ចេះ​ទទួល​ភ្ញៀវ​ពន្លឺ​មិន​លាក់​មុខ

១១.​ មាន​ថ្នាំ​កែ​រោគ​បំរុង​ទុក​មិន​ឲខ្វះ​ពេល​ត្រូវ​ការ

១២. មិន​ប្រាប់​ការសម្ងាត់​ដល់​អ្នក​ដទៃ

១៣. មិន​ផ្ញើរបស់​ទុក​នឹង​បុគ្គល​មិន​គួរ​ផ្ញើ

១៤. មាន​ចិត្ត​អត់ធន់​តស៊ូ​មិន​ញ៉ាក

១៥. មាន​ភក្តី​ភាព​ចំពោះ​ចៅហ្វាយ​នាយ

១៦.​ មិន​ចេះ​ឡឹក​ឡក់​ចំពោះ​ស្រី​ក្រមុំ

១៧. ស្គាល់​ចំនេញ​ស្គាល់​ខាត

១៨. រក​ប្រដាប់​តុប​តែង​ខ្លួន​ឲ​ភរិយា​បុត្រ​ធីតា​ និង​ខ្លួនឯង

១៩. មិន​ទិញ​ជឿ​នូវ​របស់​ប្រើ​ប្រាស់​គ្រប់​យ៉ាង

២០.​ ដឹង​គុណ​ តប​គុណ​ សរសើរ​គុណ​ នៃ​អ្នក​មាន​គុណ

២១.  គោរព​តាម​ឱវាទ មាតា​បិតា​ញាតិមិត្រ​ និង​អ្នក​ប្រាជ្ញ

២២. ចេះ​អត់​ទ្រាំ​ស្តាប់​ នូវ​ពាក្យ​ដែល​គេ​ស្តី​បន្ទោស​ប្រដៅ

២៣. មាន​កាយ​វាចា​ សមរម្យ​មិន​ឆ្គង

២៤. ឲ្យ​ដំណឹង​មនុស្ស​ក្នុង​ផ្ទះ​ហើយ​ ទើប​ចេញ​ទៅ

២៥. ចេះ​វាយ​ប្រដៅ​កូន​ដោយ​រំពាត់​យ៉ាង​តូច

២៦.​ ខឹង​ឆាប់​បាត់​មិន​ចង​កំហឹង​ទុក៕

បុរស​ដែល​ប្រកប​ដោយ​លក្ខណៈ​គ្រប់​ពេញ​ទាំង​ ២៦ ហៅ​ថា​ប្រុស​គ្រប់​លក្ខណ៍​ បើ​មិន​ពេញ​លេញ​ទេ​ មាន​ខ្វះ​ខាតខ្លះ​ ហៅ​ថា​ប្រុស​ខាត​លក្ខណ៍​ បើ​មាន​តែ​ត្រង់​នេះ​ខ្លះ​ត្រង់​នោះ​ខ្លះរដាច់​រដោច​ ហៅ​ថា​ប្រុស​ដាច់​លក្ខណ៍​ ឬ​អា​កំបាក់​ទន្សា។

(ដក​ស្រង់​ចេញ​ពី សៀវភៅ​ សុជីវធម៌​ប្រចាំ​គ្រួសារ​ ដោយ​ លោក​ សុង ស៊ីវ​)

វាយ​អត្ថបទ​ឡើង​វិញ​ដោយ គេហទំព័រ​សាលារៀន salarean.com