៥យ៉ាងធ្វើឲ្យជីវិតរីករាយ
១. មានប្រាក់ល្មមសមរស់នៅបានហើយ៖ អ្នកខ្លះខំធ្វើការទាំងថ្ងៃទាំងយប់ដើម្បីប្រាក់។ រកប្រាក់បានហើយតើសប្បាយចិត្តទេ បើជួនកាលមិនទាំងពេញចិត្តនិងការងារដែលខ្លួនកំពុងធ្វើផង។ សម្ភារៈនិយម និងទ្រព្យសម្បត្តិក្រៅខ្លួនមិនអាចធ្វើឲ្យមនុស្សមានសុភមង្គលរីក រាយក្នុងចិត្តបានទេ។ ចូរធ្វើកិច្ចការណាដែលអ្នកពេញចិត្តជារៀងរាល់ថ្ងៃ។ ចូររស់នៅយ៉ាងសាមញ្ញសមរម្យ ចាយវាយសមល្មម ហើយរីករាយនឹងអ្វីដែលខ្លូនមានសព្វថ្ងៃនេះ។
២. កុំប្រញាប់រៀបការពេក៖ និយាយបែបនេះមិនមែនមានន័យថា ការរៀបការមិនល្អនោះទេ។ មុននឹងរៀបការចូរពិចារណាឲ្យគ្រប់ជ្រុងជ្រោយ តើអ្នកពិតជាចង់ចំណាយពេលរស់នៅអស់មួយជីវិតជាមួយមនុស្សម្នាក់ នោះមែនទេ។ ការជ្រើសរើសគូស្រករតែខុសម្តងគឺខុសមួយជីវិត។ ក្រោយពេលរៀបការរួច គឺហួសពេលពោលពាក្យថាស្តាយក្រោយហើយ។ ដើម្បីឲ្យជីវិតរីករាយ ចូរពិចារណា ហើយពិចារណាទៀត មុននឹងរៀបការ។
៣. រកពេលវេលាបំពេញចិត្តខ្លួនឯងខ្លះ។ ហេតុអ្វីជួយអ្នកដទៃបាន ហេតុអ្វីបំពេញចិត្តអ្នកដទៃបាន ហេតុអ្វីធ្វើឲ្យអ្នកដទៃសប្បាយបាន តែមិនអាចធ្វើឲ្យខ្លួនឯងសប្បាយបាន? ចូរធ្វើរឿងដែលសប្បាយៗ ធ្វើកិច្ចការដែលខ្លួនចូលចិត្ត នោះអ្នកនឹងមានចិត្តរីករាយជួយដល់អ្នកដទៃទៀត។
៤. ធ្វើមិនដឹងមិនឮខ្លះចំពោះរឿងជុំវិញខ្លួន៖ សម័យបច្ចុប្បន្នមនុស្សទទួលបានព័ត៌មានពីគ្រប់ទិសទី ព្រឹត្តិការណ៍ជុំវិញពិភពលោក ទទួលបានតាមទូរទស្សន៍ អ៊ិនធើណិត ឬទូរស័ព្ទ។ យើងបានដឹងសឹងតែគ្រប់រឿង។ សួរថាតើចិត្តយើងបានស្ងប់ទេ? ជួនកាលព័ត៌មានខ្លះធ្វើឲ្យយើងព្រួយបារម្ភ ខ្លាចនេះខ្លាចនោះ ខ្លាចអសុវត្ថិភាព។ ដើម្បីជិវិតរីករាយ គួរបំភ្លេចរឿងជុំវិញខ្លួនចោល ហើយផ្តោតលើជីវិតផ្ទាល់ខ្លួនវិញ។
៥. មានមិត្តភក្តិតិចបានហើយ តែសុទ្ធតែជាកល្យាណមិត្ត មិត្តដែលអាចរួមសុខរួមទុក្ខ មិត្តជាទីទុកចិត្តដែលអាចថ្លែងប្រាប់ពីរឿងលំបាកចិត្ត សប្បាយចិត្ត។
សាលារៀន salarean.com