ម៉ាស៊ីនត្រជាក់
ម៉ាស៊ីនត្រជាក់ត្រូវបានច្នៃប្រឌិតឡើងដោយ លោក វីលីស ខារីយើ (Willis Carrier) ក្នុងឆ្នាំ ១៩០២។ ម៉ាស៊ីនត្រជាក់ដែល លោកច្នៃឡើង ប្រើសម្រាប់គ្រប់គ្រងសីតុណ្ហភាព និងសំណើម។ លោក ខារិយើ លើកឡើងថា បុព្វហេតុដែលនាំឲ្យលោកនឹកឃើញច្នៃប្រឌិតម៉ាស៊ីនត្រជាក់ឡើង គឺមានពេលយប់មួយនោះលោកបានចាំជិះរថភ្លើង ធ្វើឲ្យលោកចេះតែនឹកគិតពីបញ្ហាសីតុណ្ហភាពនិងសំណើម។ លុះដល់ពេលរថភ្លើងមកដល់ លោកស្រាប់តែអាចរកឃើញពីទំនាក់ទំនងរវាង សីតុណ្ហភាព សំណើម និងចំនុចសើម។
របកគំហើញរបស់លោកខារីយើ ផ្តល់អត្ថប្រយោជន៍ដ៏សំបើមដល់ឧស្សាហកម្មបោះពុម្ព កាត់ដេរ ថ្នាំជក់ ឱសថ និងឧស្សាហកម្មផ្សេងទៀត ដោយធ្វើឲ្យផលិតភាពការងាររបស់កម្មករប្រសើរឡើង និងជួយបង្កើនគុណភាពផលិតផល។ លោក ខារីយើ រួមនឹងវិស្វករ ៦ នាក់ទៀតបានបង្កើតជាក្រុមហ៊ុនមួយ ក្នុងឆ្នាំ១៩១៥ ដោយដាក់ឈ្មោះថា សាជីវកម្មវិស្វកម្មខារីយើ ជាក្រុមហ៊ុនដែលផ្តោតជាសំខាន់លើបច្ចេកវិទ្យាម៉ាស៊ីនត្រជាក់។ ក្រុមហ៊ុននេះចាប់ផ្តើមដំបូងមានទឹកប្រាក់ប្រមាណ ៣៥០០០ ដុល្លារអាមេរិច លុះដល់ឆ្នាំ ១៩៩៥ ចំណូលពីការលក់មានប្រមាណជា ៥ពាន់លាន ដុល្លារអាមេរិច។
សាលារៀន salarean.com