ព្រះបរមនាមអតីតព្រះមហាក្សត្រ ប្រែជាភាសាសំរាយ
ព្រះបរមនាមអតីតព្រះមហាក្សត្រ គឺ "ព្រះបាទ សម្ដេចព្រះ នរោត្ដម សីហនុ រាជហរិវង្ស ឧភតោសុជាតិ វិសុទ្ធពង្ស អគ្គមហាបុរសរតន៍ និករោត្ដម ធម្មិកមហារាជាធិរាជ បរមនាថ បរមបពិត្រ ព្រះចៅក្រុងកម្ពុជាធិបតី" ។ ពាក្យនីមួយៗក្នុងព្រះបរមនាមនេះ សុទ្ធសឹងតែជាសព្ទបាលី សំស្រ្កឹត ដែលមានអត្ថន័យជ្រៅ ប្រសិនបើមិនពូកែខាងអក្សរសាស្ត្រខ្មែរទេ មុខតែមិនអាចយល់អត្ថន័យពិតបានឡើយ។
សាលារៀនដតខមសូមលើកយកអត្ថន័យជាពាក្យសំរាយ ដែលស្រង់ចេញពីសៀវភៅ ភាសាខ្មែរ និពន្ធដោយ លោក អៀវ កើស ការផ្សាយរបស់ពុទ្ធសាសនបណ្ឌិត្យ ព.ស ២៥៣៩ ដូចតទៅ៖
ព្រះ ប្រែថាប្រសើរ
បាទ ប្រែថាជើង
សម្តេច មិនមែនពាក្យបាលីមិនបាច់ប្រែ
ព្រះ ប្រែរួចហើយ
នរោត្តម < នរ + ឧត្តម
នរ ប្រែថាមនុស្ស
ឧត្តម ប្រែថាខ្ពស់បំផុត ប្រសើរណាស់
សីហនុ < សីហ + ហនុ
សីហ ប្រែថាតោ ស្តេចសត្វ
ហនុ ថ្គាម
ការបញ្ចូលជាបទទសមាសប្រែថា មនុស្សដ៏ខ្ពង់ខ្ពស់ ជាស្តេច
រាជហរិរង្ស < រាជ + ហរិ + វង្ស ប្រែថាពូជព្រះនរាយន៍ជាស្តេច
រាជ ប្រែថាស្តេច
ហរិ ប្រែថាព្រះនរាយន៍
វង្ស ប្រែថា ពូជ ត្រកូល
ឧភតោសុជាតិ < ឧភតោ + សុជាតិ
ឧភតោ ប្រែថាទាំងពីរពង្ស (ទាំងខាងសម្តេចព្រះបរមរាជបិតា ទាំងខាងសម្តេចព្រះរាជជននី)
សុជាតិ ប្រែថាបានកើតមកដោយប្រពៃ
វិសុទ្ធិពង្ស< វិសុទ្ធិ + ពង្ស
វិសុទ្ធិ ប្រែថាសេចក្តីស្អាតវិសេសឥតមន្ទិល
ពង្ស ស្មើនឹងពាក្យ វង្ស (អធិប្បាយរួចហើយ)
អគ្គមហាបុរសរតន៍ < អគ្គ + មហា + បុរស + រតន៍
អគ្គ ប្រែថា កំពូល
មហា ប្រែថា ធំ
បុរស ប្រែថា ប្រុស
រតន៍ ប្រែថា ដែលញាំងចិត្តឲ្យរីករាយ ដោយចំពោះគឺ កែវ ពេជ្រ ត្បូង គ្រប់យ៉ាង
និករោត្តម < និករ + ឧត្តម
និករ ប្រែថាពួក
ឧត្តម អធិប្បាយរួចហើយ
ធម្មិកមហារាជាធិរាជ < ធម្មិក + មហា + រាជាធិរាជ
ធម្មិក ប្រែថា ប្រកបដោយធម៌ កាន់សេចក្តីយុត្តិធម៌ ត្រឹមត្រូវ
មហា អធិប្បាយរួចហើយ
រាជាធិរាជ ស្តេចលើស្តេច
បរមនាថ < បរម + នាថ
បរម ប្រែថា ខ្ពស់បំផុត ក្រៃលែង
នាថ ប្រែថា អ្នករក្សាថែទំា ម្ចាស់ នាយ
បរមបពិត្រ < បរម + បពិត្រ
បរម អធិប្បាយរួចហើយ
បពិត្រ ប្រែថាគ្រឿងសំអាតឲ្យបរិសុទ្ធ អ្នកមានទ្រព្យជាគ្រឿងរីករាយ
ព្រះចៅក្រុងកម្ពុជាធិបតី < ព្រះ ចៅ ក្រុង កម្ពុជាធិបតី
ព្រះ អធិប្បាយរួចហើយ
ចៅ មិនមែនពាក្យបាលី សំស្ក្រឹត
ក្រុង មិនមែនពាក្យបាលី សំស្ក្រឹត
កម្ពុជាធិបតី < កម្ពុជា + អធិ + បតិ
កម្ពុជា ប្រែថាស្រុកខ្មែរ
អធិ ប្រែថានៅលើ
បតិ ប្រែថាម្ចាស់
សៀវភៅភាសារខ្មែរ ការល្បងពិនិត្យរកហេតុផល និពន្ធដោយ លោក អៀវ កើស ការផ្សាយរបស់ពុទ្ធសាសនបណ្ឌិត្យ ព.ស ២៥៣៩
សម្រង់ខ្លឹមសារ និង វាយអត្ថបទដោយ សាលារៀន salarean.com